सिमरामा चक्कु प्रहारबाट युवकको मृत्यु, घटनामा संलग्न व्यक्ति फरार

 

बारा, ३ असोज/  बाराको सिमरामा चक्कु प्रहारबाट एक युवकको मृत्यु भएको छ। जीतपुरसिमरा उपमहानगर पालिका–२ स्थित सम्झना स्टाफ होटलमा शनिबार साँझ भएको विवादका क्रममा स्थानीय ३५ वर्षीय शेरबहादुर खड्कामाथि चक्कु प्रहार भएको प्रहरीले जनाएको छ।

होटलमा खाजा खाने क्रममा विवाद उत्पन्न भएपछि भान्सामा प्रयोग हुने चक्कुले खड्कामाथि आक्रमण गरिएको प्रारम्भिक अनुसन्धानबाट खुलेको इलाका प्रहरी कार्यालय सिमराले जनाएको छ।

चक्कु प्रहारबाट खड्काको घाँटीमा गम्भीर चोट लागेको थियो। घाइते खड्कालाई तत्काल उपचारका लागि वीरगञ्ज लगिएकोमा अस्पताल पुर्‍याएलगत्तै चिकित्सकले मृत घोषणा गरेका थिए।

घटनापछि चक्कु प्रहारमा संलग्न व्यक्ति फरार रहेको प्रहरीले जनाएको छ। फरार व्यक्तिको खोजी भइरहेको र घटनाबारे थप अनुसन्धान अघि बढाइएको इलाका प्रहरी कार्यालय सिमराले जनाएको छ।