काठमाडौं, २३ भदौ । काठमाडौंको माइतीघर मण्डलामा आयोजित दीप प्रज्वलन कार्यक्रमका क्रममा एक महिलाले आफ्नै शरीरमा आगो लगाएर आत्मदाहको प्रयास गरेकी छन्।
दीप प्रज्वलन कार्यक्रम चलिरहेका बेला लक्ष्मी बस्नेत नाम गरेकी महिलाले शरीरमा आगो लगाएको जिल्ला प्रहरी परिसर काठमाडौंले जनाएको छ।
घटना लगत्तै प्रहरी तथा स्थानीयको सहयोगमा आगो निभाइएको थियो। आगोबाट घाइते भएकी बस्नेतलाई तत्काल उपचारका लागि वीर अस्पताल पुर्याइएको प्रहरीले जनाएको छ।
जिल्ला प्रहरी परिसर काठमाडौंका सूचना अधिकारी एवं प्रहरी उपरीक्षक दानबहादुर थापाका अनुसार उनको अहिले वीर अस्पतालमा उपचार भइरहेको छ। उनको स्वास्थ्य अवस्थाबारे थप विवरण संकलन भइरहेको प्रहरीले जनाएको छ।
घटनाको कारण भने खुल्न बाँकी छ। प्रहरीले घटनाबारे अनुसन्धान अघि बढाएको जनाएको छ।
Comments
Post a Comment