जिल्ला प्रहरी कार्यालय पर्साबाट सञ्चालित विशेष अभियानअन्तर्गत वडा प्रहरी कार्यालय श्रीपुरबाट खटिएको टोलीले गण्डकस्थित क्लार्क रिसोर्ट होटलमा रहेको क्यासिनोबाट यादव र प्रहरी निरीक्षक पौडेलसहित आठ जनालाई नियन्त्रणमा लिएको हो।
प्रहरीले क्यासिनो परिसरबाट सखुवा प्रसौनी गाउँपालिकाको सरकारी सवारीसाधन ना.१ झ १६८७ नम्बरको स्कोर्पियो समेत नियन्त्रणमा लिएको छ। जनताको सेवा र सरकारी कामका लागि प्रयोग हुनुपर्ने सवारीसाधन क्यासिनो परिसरमा भेटिएपछि यसको प्रयोगसम्बन्धी विषय अनुसन्धानको दायरामा आएको छ।
घटनाले अझ गम्भीर प्रश्न प्रहरी निरीक्षक पौडेलको उपस्थितिलाई लिएर उठाएको छ। गैरकानुनी गतिविधि नियन्त्रण तथा कानून कार्यान्वयनको जिम्मेवारीमा रहेका बहालवाला प्रहरी अधिकृत आफैं क्यासिनो परिसरमा भेटिनुले उनको उपस्थितिको उद्देश्यबारे समेत प्रश्न खडा गरेको छ।
प्रहरीले अध्यक्ष यादव र निरीक्षक पौडेल क्यासिनोमा कुन प्रयोजनका लागि पुगेका थिए, सरकारी सवारीसाधन कसरी प्रयोग भयो र घटनामा अन्य व्यक्तिको भूमिका के थियो भन्ने विषयमा अनुसन्धान अघि बढाएको बताइएको छ।
यद्यपि, उनीहरू क्यासिनोमा पुगेको मात्र आधारमा कुनै गैरकानुनी गतिविधिमा संलग्न रहेको निष्कर्ष निकाल्न मिल्दैन। प्रहरीले अनुसन्धानबाट प्राप्त तथ्यका आधारमा उनीहरूको भूमिकाबारे थप स्पष्ट पार्ने अपेक्षा गरिएको छ।
सरकारी सवारीसाधनको प्रयोगदेखि बहालवाला प्रहरी अधिकृतको क्यासिनो उपस्थितिसम्मका विषयले घटनालाई सामान्य पक्राउभन्दा बाहिर पुर्याएको छ। अब प्रहरी अनुसन्धानले सरकारी गाडी किन क्यासिनो पुग्यो, त्यहाँ पक्राउ परेकाहरूको वास्तविक उद्देश्य के थियो र घटनामा कुनै कानुनी उल्लंघन भएको थियो वा थिएन भन्ने प्रश्नको जवाफ दिनुपर्ने देखिन्छ।
.jpg)
COMMENTS