पर्साको पोखरियामा कर्मचारीले तलब पाएनन्, सरसफाइ सेवा ठप्प

धर्मेन्द्र चौरसिया, पोखरिया, २९ असोज/  पर्साको पोखरिया नगरपालिकामा कार्यरत कर्मचारीहरूले दशैंको मुखमा समेत तलब पाउन सकेका छैनन् । लामो समयदे...

धर्मेन्द्र चौरसिया, पोखरिया, २९ असोज/ पर्साको पोखरिया नगरपालिकामा कार्यरत कर्मचारीहरूले दशैंको मुखमा समेत तलब पाउन सकेका छैनन् । लामो समयदेखि तलब भुक्तानी नहुँदा करार तथा स्थायी कर्मचारी आर्थिक समस्यामा परेका छन् भने तलबको माग गर्दै सरसफाइकर्मीले काम बन्द गरेपछि नगर क्षेत्रको सरसफाइ सेवा प्रभावित भएको छ । नगरपालिकामा कार्यरत करारका कर्मचारीहरूको छ महीनादेखि १२ महिनासम्मको तलब बाँकी रहेको बताइएको छ । त्यस्तै, सरसफाइकर्मीहरूले विगत १० महीनादेखि तलब नपाएको गुनासो गरेका छन् । केही कर्मचारीले बेलाबखत तलब पाए पनि अधिकांशले नियमित तलब तथा सुविधा प्राप्त गर्न नसकेको जनाइएको छ ।

लामो समयसम्म तलब नपाउँदा दैनिक घरखर्च चलाउनसमेत कठिन भएको कर्मचारीहरूको भनाइ छ । दशैंजस्तो ठूलो चाड नजीकिंदा पनि पारिश्रमिक नपाएपछि कर्मचारी तथा उनीहरूका परिवार थप आर्थिक समस्यामा परेका छन् ।
तलब भुक्तानीको माग गर्दै सरसफाइकर्मीहरूले केही दिनदेखि काम ठप्प पारेका छन् । उनीहरूले काम बन्द गरेपछि नगर क्षेत्रमा नियमित सरसफाइ हुन सकेको छैन । यसले फोहोर व्यवस्थापनमा समस्या बढ्ने चिन्ता उत्पन्न भएको छ ।
यस विषयमा पोखरिया नगरपालिकाका प्रमुख प्रद्युम्न चौहानले नगरसभा हुन नसकेको कारण नगरपालिकाको खाता सञ्चालनमा समस्या आएको र त्यसैले कर्मचारीलाई तलब भुक्तानी गर्न नसकिएको बताएका छन् ।
नगरसभा सम्पन्न गराउन पहल भइरहेको जानकारी दिंदै नगरप्रमुख चौहानले समस्या चाँडै समाधान हुने र कर्मचारीको तलब भुक्तानी प्रक्रिया अघि बढ्ने विश्वास व्यक्त गरेका छन् ।
नगरपालिकामा लामो समयदेखि तलब भुक्तानी हुन नसक्दा कर्मचारीको आर्थिक अवस्था प्रभावित हुनुका साथै नगरवासीले प्राप्त गर्दै आएको अत्यावश्यक सरसफाइ सेवासमेत प्रभावित भएको छ ।
कर्मचारीको बाँकी तलब भुक्तानी र सरसफाइ सेवा नियमित बनाउन नगरपालिकाले तत्काल पहल गर्नुपर्ने देखिएको छ । नगरसभा समयमैं सम्पन्न गरी आर्थिक तथा प्रशासनिक समस्या समाधान गर्न सकेमा कर्मचारीलाई राहत पुग्नुका साथै नगर क्षेत्रको सरसफाइ व्यवस्थासमेत पुनः नियमित हुने अपेक्षा गरिएको छ