पोखरिया, १० असोज । पर्साको एक विद्यालयका करारमा कार्यरत प्रधानाध्यापकलाई अदालतको आदेश कार्यान्वयन नगरेको आरोपमा प्रहरीले नियन्त्रणमा लिएर छोडेको छ।
श्री जानकी राजेश आधारभूत विद्यालयका प्रधानाध्यापक रामदिनेश पण्डितलाई इलाका प्रहरी कार्यालय पोखरियाले नियन्त्रणमा लिएर अनुसन्धान पछि छोडेको हो। विद्यालयमा सरुवा भएर आएका स्थायी शिक्षकहरूलाई लामो समयसम्म हाजिर हुन नदिएको तथा उच्च अदालतको आदेशसमेत कार्यान्वयन नगरेको आरोप उनीमाथि लागेको छ।
विद्यालयमा करिब साढे पाँच महिनाअघि सरुवा भएर आएका स्थायी शिक्षकहरूले हाजिर गराउन माग गर्दै सम्बन्धित निकायमा निवेदन तथा कानुनी प्रक्रिया अघि बढाएका थिए। सोही क्रममा उच्च अदालतले सरुवा भएर आएका शिक्षकहरूलाई विद्यालयमा हाजिर गराउन आदेश दिएको बताइएको छ।
तर अदालतको आदेश जारी भएपछि पनि शिक्षकहरूलाई विद्यालयमा हाजिर नगराइएको भन्दै प्रधानाध्यापक पण्डितविरुद्ध उजुरी परेको थियो। अदालतको आदेश कार्यान्वयनमा अवरोध गरेको र सरुवा भएर आएका शिक्षकहरूलाई विद्यालय प्रवेश तथा हाजिरीबाट वञ्चित गरेको आरोपसहित परेको उजुरीका आधारमा प्रहरीले उनलाई नियन्त्रणमा लिएको जनाएको छ।
प्रहरीका अनुसार उजुरीसँगै प्राप्त प्रमाण तथा घटनाको प्रारम्भिक विवरणका आधारमा पण्डितलाई नियन्त्रणमा लिएर आवश्यक अनुसन्धान सुरु गरिएको हो। घटनासँग सम्बन्धित पक्षहरूसँग सोधपुछ तथा आवश्यक कानुनी प्रक्रिया अघि बढाइरहेको प्रहरीले जनाएको छ।
यद्यपि, प्रधानाध्यापक पण्डितमाथि लगाइएका आरोपहरू अनुसन्धानकै क्रममा रहेकाले आरोप पुष्टि हुन बाँकी छ। अनुसन्धानबाट घटनाको वास्तविकता तथा कानुनी अवस्थाबारे थप स्पष्ट हुने प्रहरीले जनाएको छ।
.jpg)
COMMENTS