बलिराम शुक्ला, ९ बिरुवागुठी/ पर्सागढी नगरपालिकाका विभिन्न वडा क्षेत्रमा जडान गरिएका टावर लाइटको विद्युत् लाइन नेपाल विद्युत् प्राधिकरण सिमराले काटिदिएपछि नगरपालिकाका मुख्य चोक तथा बजार क्षेत्र अन्धकारमा परेका छन् ।
नगरपालिकाको वडा नं ३ अन्तर्गत पर्ने बडनिहार चोक र पारस पटेल चोक तथा वडा नं १ को मनवा बजारमा जडान गरिएका टावर लाइटको विद्युत् लाइन काटिएको हो । स्थानीयका अनुसार मनवा बजार र पारस पटेल चोकको टावर लाइटको लाइन काटिएको महीनौं भइसकेको छ भने बडनिहार चोकको लाइन करीब एक साता अघि मात्र काटिएको हो । मुख्य बजार तथा चोकको विद्युत् लाइन लामो समयदेखि काटिए पनि टावर लाइट पुनः सञ्चालनका लागि स्थानीय सरकारले हालसम्म प्रभावकारी पहल नगरेको स्थानीयवासीको गुनासो छ । साँझ तथा रातको समयमा बजार क्षेत्र अन्धकार हुँदा स्थानीयवासी, पैदलयात्री तथा व्यापारीलाई आवतजावतमा समस्या भएको छ
पर्सागढी नगरपालिका–३ का स्थानीय सुशील पौडेलका अनुसार टावर लाइटमा जडान गरिएका मिटरको विद्युत् महसूल सम्बन्धित वडा तथा नगरपालिकाले वर्षौंदेखि भुक्तानी नगरेका कारण नेपाल विद्युत् प्राधिकरणले लाइन काटेको हो । उनका अनुसार विद्युत् महसूलबापत लाखौं बक्यौता रहेकोले प्राधिकरणले विद्युत् आपूर्ति बन्द गरेको हो । टावर लाइट बन्द हुँदा मुख्य चोक तथा बजार क्षेत्रको सुरक्षा र रात्रि व्यापारिक गतिविधिमा समेत असर परेको स्थानीयको भनाइ छ । स्थानीयवासीले नगरपालिकाले तत्काल बक्यौता विद्युत् महसूल भुक्तानी गरी टावर लाइट पुनः सञ्चालनमा ल्याउन माग गरेका छन् । उनीहरूले बजार तथा चोकजस्ता सार्वजनिक स्थानमा रातको समयमा पर्याप्त प्रकाशको व्यवस्था गर्न स्थानीय सरकार गम्भीर बन्नुपर्ने बताएका छन् । यसैगरी ओखरिया नगरपालिकाको वार्ड नम्बर ४ बस स्टेनमा रहेको टावरलाई बिग्रेको कारण चोक नै अन्धकार भएको छ। टावरलाइटमा खराबी आएर विगत एक दुई महिनादेखि बन्द रहेको छ।
.jpg)
COMMENTS