नारायणी अस्पताल प्रकरण: चिकित्सकहरुको सामूहिक राजीनामा

  वीरगञ्ज,१२ साउन /वीरगञ्जस्थित नारायणी अस्पतालमा चिकित्सकमाथि भएको आक्रमण तथा अस्पतालमा भएको तोडफोडको विरोधमा अस्पतालका चिकित्सकहरूले सामूह...

 

वीरगञ्ज,१२ साउन /वीरगञ्जस्थित नारायणी अस्पतालमा चिकित्सकमाथि भएको आक्रमण तथा अस्पतालमा भएको तोडफोडको विरोधमा अस्पतालका चिकित्सकहरूले सामूहिक राजीनामा दिएका छन्।

गत शनिबार भएको घटनापछि आन्दोलनमा उत्रिएका चिकित्सकहरूले प्रमुख जिल्ला अधिकारी (सीडीओ) र जिल्ला प्रहरी कार्यालय पर्साका प्रहरी उपरीक्षक (एसपी) को राजीनामा माग गरेका थिए। आफ्ना माग सम्बोधन नभएको भन्दै उनीहरूले सामूहिक रूपमा पदबाट राजीनामा दिएका हुन्।

अस्पताल स्रोतका अनुसार नारायणी अस्पतालमा कार्यरत करिब ७० जना चिकित्सकमध्ये ३० जनाले सोमबार राति करिब १० बजे अस्पतालका मेडिकल सुपरिन्टेन्डेन्ट डा. चित्तरञ्जन साहसमक्ष राजीनामा बुझाएका थिए। त्यसपछि सोमबार साँझसम्म ६० देखि ६५ जना चिकित्सकले राजीनामा दिइसकेको बताइएको छ।

चिकित्सकहरूले अस्पतालमा कार्यरत स्वास्थ्यकर्मीको सुरक्षा सुनिश्चित गर्न, घटनामा संलग्न दोषीमाथि कडा कानुनी कारबाही गर्न तथा घटनाको नैतिक जिम्मेवारी लिँदै प्रमुख जिल्ला अधिकारी र एसपीले राजीनामा दिनुपर्ने माग गरेका छन्।

उनीहरूले आफ्ना माग पूरा नभए आन्दोलनलाई देशव्यापी बनाइने र आवश्यक परे देशभरका चिकित्सकले समेत सामूहिक राजीनामा दिने चेतावनी दिएका छन्।

शनिबार नारायणी अस्पतालमा चिकित्सकमाथि कुटपिट हुनुका साथै अस्पतालमा तोडफोड भएको घटनापछि स्वास्थ्यकर्मीहरू आन्दोलनमा उत्रिएका हुन्।