पोखरिया,२२ असार/ पर्सा प्रहरीले विशेष सूचनाको आधारमा ठूलो परिमाणमा लागूऔषध गाँजा बरामद गर्दै एक भारतीय नागरिकलाई पक्राउ गरेको छ।
जिल्ला प्रहरी कार्यालय पर्साका अनुसार आइतबार राति करिब ११:०० बजे पर्साको जगरनाथपुर गाउँपालिका–२ स्थित इनर्वा जाने चोकमा इलाका प्रहरी कार्यालय जानकीटोलाबाट खटिएको प्रहरी टोलीले भारततर्फ जाँदै गरेको BR 01 CU 3544 नम्बरको सेतो रङको स्पोर्ट्स कारलाई रोकी जाँच गरेको थियो।
जाँचका क्रममा कारभित्र लुकाइछिपाइ राखिएको १०२ केजी ६३६ ग्राम लागूऔषध गाँजा बरामद भएको प्रहरीले जनाएको छ। बरामद गाँजा १० वटा पोकामा प्याक गरिएको अवस्थामा फेला परेको थियो।
प्रहरीले कार चालक भारतको बिहार राज्य, बेतिया जिल्ला, नवलपुर निवासी ३२ वर्षीय गुडु वर्मालाई नियन्त्रणमा लिएको जनाएको छ। पक्राउ परेका वर्मामाथि लागूऔषध सम्बन्धी कसुरमा आवश्यक अनुसन्धान भइरहेको जिल्ला प्रहरी कार्यालय पर्साका प्रवक्ता तथा सूचना अधिकारी प्रहरी नायब उपरीक्षक राजु कार्की बताए ।
यद्यपि, प्रहरी स्रोतबाहेक प्राप्त जानकारीअनुसार उक्त गाडीबाट बरामद गाँजाको वास्तविक परिमाण १५० केजीभन्दा बढी हुन सक्ने तथा घटनाका बेला गाडीमा चालकसहित चार जना सवार रहेको दाबी गरिएको छ। तर यस विषयमा प्रहरीले आधिकारिक पुष्टि गरिसकेको छैन। घटनाका बारे प्रहरीले थप अनुसन्धान गरिरहेको जनाएको छ।
.jpg)
COMMENTS