पर्सागढीमा नवनिर्मित विद्यालय भवन र कम्प्युटर ल्याब उद्घाटन, शिक्षामा सुधार भइरहेको दाबी

 

धर्मेन्द्र चौरसिया, पोखरिया,२५जेठ/ पर्सा गढी नगरपालिका वडा नं. २ स्थित श्री भोजिया देवी आधारभूत विद्यालय, गोडपसरामा सोमबार नवनिर्मित दुई कोठे भवन तथा कम्प्युटर ल्याबको उद्घाटन गरिएको छ।

प्रदेश सरकारको २५ लाख रुपैयाँको लागतमा निर्माण गरिएको दुई कोठे जस्तापाताको भवन तथा पर्सागढी नगरपालिकाको सहयोगमा सञ्चालनमा आएको कम्प्युटर ल्याबको उद्घाटन पर्सागढी नगरपालिकाका नगरप्रमुख एवं कार्यक्रमका प्रमुख अतिथि गोकर्ण पाठकले गरेका हुन्।

उद्घाटन कार्यक्रममा बोल्दै नगरप्रमुख पाठकले आफ्नो कार्यकालमा पर्सागढी क्षेत्रका विद्यालयहरूमा हालसम्म ११ वटा विद्यालय भवन निर्माण गरिएको जानकारी दिए। उनले विद्यालयहरूमा रिक्त रहेका २३ वटा दरबन्दी पूर्ति गरिएको र आवश्यकता अनुसार शिक्षक व्यवस्थापन गरिएको बताए।

उनले विगतको तुलनामा पर्सागढीको शैक्षिक अवस्था दिनप्रतिदिन सुधार हुँदै गएको उल्लेख गर्दै शिक्षाको गुणस्तर अझ उकास्न अभिभावक, शिक्षक, शिक्षाप्रेमी तथा राजनीतिककर्मी सबैको सहकार्य आवश्यक रहेको धारणा राखे।

पूर्व शिक्षक जगदीश प्रसाद दासको अध्यक्षतामा सम्पन्न कार्यक्रममा वडा अध्यक्ष वीरेन्द्र प्रसाद महतो थारु, विद्यालय व्यवस्थापन समितिका अध्यक्ष बृजलाल चौधरी, प्रधानाध्यापक बिनोद चौधरी, राजाराम शाह, रामबहादुर चौधरी, आसमान नेपालका धर्मेन्द्र चौरसिया लगायतले मन्तव्य व्यक्त गरेका थिए।

कार्यक्रममा स्वागत मन्तव्य विविता पाठकले राखेकी थिइन् भने सञ्चालन टंकबहादुर धमलाले गरेका थिए।