कलैया,बारा /४ जेष्ठ
बाराको सदरमुकाम कलैयामा तेस्रो लिङ्गी र किन्नर समूहबीच आपसी विवाद उत्पन्न भएपछि स्थिति तनावग्रस्त बनेको छ। विवाद चर्किंदै गएपछि स्थिति नियन्त्रणमा लिन प्रहरीले एकजना तेस्रो लिङ्गीलाई नियन्त्रणमा लिएको जनाएको छ।
साथीलाई पक्राउ गरिएको विरोधमा आक्रोशित बनेका तेस्रो लिङ्गी तथा मपुते (मङ्गलमुखी पुरुष तेस्रो लिङ्गी) हरूले जिल्ला प्रहरी कार्यालय बाराको मुख्य गेट अगाडि प्रदर्शन गरेका छन्। प्रदर्शनका क्रममा केही आन्दोलनकारीहरूले सडकमै कपडा खोलेर अर्धनग्न तथा नग्न प्रदर्शन गर्दै प्रहरी प्रशासनविरुद्ध नाराबाजी गरेका थिए।
प्रदर्शनकारीहरूले पक्राउ परेका व्यक्तिलाई बिनासर्त तत्काल रिहा गर्नुपर्ने माग गरेका छन्। प्रदर्शनका कारण केही समय जिल्ला प्रहरी कार्यालय आसपासको क्षेत्र तनावग्रस्त बनेको थियो भने सडक आवागमन समेत प्रभावित भएको स्थानीयले बताएका छन्।
स्थिति नियन्त्रणमा लिन ठूलो संख्यामा प्रहरी परिचालन गरिएको थियो। प्रहरीले प्रदर्शनकारीहरूलाई सम्झाइबुझाइ गर्दै अवस्था सामान्य बनाउने प्रयास गरेको जनाएको छ।
घटनाको मुख्य कारण तथा विवादको विस्तृत विषयमा अनुसन्धान भइरहेको जिल्ला प्रहरी कार्यालय बाराले जनाएको छ।
.jpg)
COMMENTS